Korpu kastanhu.

Nta konvidou po bem konxi nha mundu di rimas, medus y desejus em formas di poemas ki é padaz di nha ser, ki sempri ta sta ta muda. Aproveita kada instanti. Nta spera ma ta ser agradável.

N’kré

Séu azul

txon kenti.

Txeu alguém

ku fresku ta bendi.

N’kré um abraçu forti

y um beju suavi,

antis denti sendi.

Kel seu azul infinitu, ku um sol ta transborda energia. Energia ki ta transforma txon em um tipu di frigidera. Veron é algu bunitu, ma també é ta kastiga kes alguem ki ka podi skodji hora y lugar kes ta fika na sol.

Em kada necessidadi ta nasi um oportunidadi , benbedoris di kuzas sabi, friu y xeiu di açucar ta kenta ses korpu pes freska dinós y klaru, resebendu ses sustentu. Nós tudo nu mestel.

Y pa um final antiklimátiku, nta trasi silênsiu…

Ya, nsabi, veron y silensiu ta kombina tantu sima um paródia ti manxi só na leti kenti y bolachinhas.

Ma nkré fala di um gestu sem enfeitis, um abraçu y um beijinhu sem gargalhadas exageradas, y klaru, nka sta fla ma es é um gestu falsu.

Apenas nta apresia o símples.

Y kes dos mundo la podi konvive, kada um na si hora.

Póti

Nós tudu nu tem nos ponto fraku. Y tem uns mumentus ki nos frakeza ta konsigui um forsa ki ta supera nos forsa di vontadi.

Ma ta parsi ma tem algu além, ki ta mante-nu na luta, nka sabi dretu modi nta txomal.

Nós proteson é algu fundamental, sima um kapoti na meiu di tempestadi. Ma nu tem ki toma atenson pa kel protenson la ka konsuminu y pului nos essênsia.

Nhós diskulpam, sempri nta sta ta fla, kuidadu ku keli y ku kela. ma é algu ki sempri nta fla pa mi mesmu. Ntom kela ta refleti na nha diskurso.

Nhós fika dretu.

Bom jornada.

Medu

Oxi nu ta vivi na um sociedade di metas. Undi tudu ta parsi ser um korrida sem fim pa nu tem tudu ki tudu otus alguem dja konsigui mil anus atrás. Y nu tem ki korri traz  des traféus tudu santu segundu y tudu santu segundu kes traféus ta bira sinza y es ta lebadu pa bentu, ki más ta parsi ser um treinador nervoso ku um apitu na boka ta kaba ku nós obidu.

Ntom medu ta fika ta persiguinu a kada passu.

Sima medu di prazeris ki ta kaba pa maxukanu di algum jeitu. É reidi sabi duranti nu sta xintil, ma é ta fazenu mal dipós. Y kela ta lembram kel koserinha sabi ki ta fazenu frida.

Um frida ki nu tem ki kura.

Tem mumentus ki medu é tantu ki ta konsuminu.

Axu ki nós tudo dja nu tevi kes mumentos la.

Um medu ki ta pirsiguim é medu di julga otus y um spedju parsi pa mostram omesmu fadjas. Talvez asi nha dedu indikador ta durmi um koxi. y asi npod odja ami na mundu y mundu na mi. 

Y tenta ser midjor pa ki mundu na mi ser midjor.